Navigieren in Scuol

Subnavigation: Fracziuns

Guarda

Ün cordial bainvgnü a Guarda

Guarda as rechatta sün üna terrassa sulagliva drizzada vers süd. La populaziun ha savü fingià adura cha lur cumün ha üna bellezza extraordinaria. Dürant ils ons 1939 fin 1945 sun gnüts renovats bod 30 chasas. La Protecziun da la patria ha onurà il cumün da Guarda dal 1975 cul premi "Henri Louis Wakker".

Üna da las bellas chasas grondas ha inspirà ad Alois Carigiet per sias illustraziuns da l'istorgia "Uorsin".

Il nom Guarda

Dal 1160 cumpara il nom Warda per la prüma jada, quai in connex cun üna donaziun per l'ovais-ch da Cuoira. Warda es ün pled da la lingua germana veglia chi voul dir "post d'observaziun" (il pled tudais-ch "Warte" ha la listessa ragisch). La via d'Engiadina dal temp d'immez riva sü Guarda ad ün da seis puncts culminants (amo hoz as gioda üna bella vista davent da quel lö). Plü probabel es quai il motiv cha'l cumün ha survgni seis nom. L'anteriura existenza d'üna tuor da guardgia invezza nun es cumprovada.

Funtana: Guarda, Not Caviezel, © Schweizer Kunstführer, herausgegeben von der Gesellschaft für Schweizerische Kunstgeschichte.

La vopna da l'anteriur cumün da Guarda

Descripziun: Gial nair chi chanta.

Motivaziun: La vopna simbolisescha il nom dal cumün. Il gial vigilant es ün simbol fich vegl e cumpara tanter oter eir aint illa bibla.

Culuors dal cumün: alb-nair

Cifras e fats sur dad Guarda

  • Parts da la fracziun

    • Guarda
    • Giarsun

  • Surfatschas

    Surfatscha totala 3’145 ha
    Terrain agricul 34.1%
    God e frus-chaglia 13.1%
    Terrain abità 0.54%
    Surfatschas improductivas 52.2%

  • Otezzas sur mar

    Cumün 1’653 m
    Punct il plü ot (Piz Buin) 3’312 m
    Punct il plü bass (En, sboccadüra Aua da Magnacun) 1’420 m

  • Populaziun

    Abitants 195
    Persunas cun dret da vuschar 135

  • Linguas

    Rumantsch 49.2%
    Tudais-ch 37.4%
    Otras linguas 13.3%

    Las pertschientualas as referischan a la lingua principala. Tuot ils Rumantschs san duos o plüssas linguas. 

  • Confessiuns

    Evangelic-refuormà 61.5%
    Catolic-roman 16.4%
    Otras religiuns e persunas sainza confessiun 22.1%

  • Economia publica

    Persunas occupadas tenor sectuors
    1.  Agricultura e silvicultura 21.7%
    2. Industria e mansteranza producenta 21.7%
    3. Servezzans 56.5%